BOLE SO NIHAL

ਬੋਲੇ ਸੋ ਨਿਹਾਲ
ਸਤਿ ਸ੍ਰੀ ਅਕਾਲ

ਗੁਰਾਂ ਦੀ ਬਖਸ਼
ਇਹ ਅਗੰਮੀ
ਜੋ
ਬਾਲਦੀ ਭਾਂਬੜ
ਪੰਥ ਦੀ ਰੂਹ ਵਿਚ
ਅਦੁਤੀ ਕੜਕ ਬਣ ਲਿਸ਼ਕਦੀ
ਲਹਿਰਦੀ ਸ਼ਮਸ਼ੀਰ ਵਿਚ
ਘਣਘੋਰ ਜੁਧਾਂ ਤੋਂ ਡਰੇ ਬੈਠੇ
ਅਸਮਾਨ ਨੂੰ ਦਿਲਾਸਾ ਬਖਸ਼ਦੀ
ਜੁਲਮ ਦਾ ਲਹੂ ਸੋਕ
ਦੇਵੇ ਤਾਣ ਨਿਤਾਣਿਆਂ ਤਾਂਈਂ
ਕਿਸੇ ਅਗੰਮੀ ਹੜ੍ਹ ਦਾ ਜੋਰ ਬਣ
ਲਿਆ ਖੜ੍ਹਾ ਕਰਦੀ
ਕਲੇ- ਕਲੇ ਸੂਰਬੀਰ ਨੂੰ
ਸਵਾ-ਸਵਾ ਲਖ ਦੇ ਸਾਹਵੇਂ।

ਇਸਦੀ ਵਿਰਾਟ ਗਰਜ
ਬਜਰ ਕਪਾਟਾਂ ਨੂੰ ਚੀਰ
ਉਹਨਾ ਨੂੰ ਫ਼ਨਾਹ ਕਰ
ਬਖਸ਼ਦੀ ਝਲਕਾਰੇ
ਦਾਤੇ ਦੇ ਦਰਸ ਦੇ।

ਮੇਰਾ ਧੁਰ ਅੰਦਰ ਲਹਿਰਾ ਜਾਂਦਾ
ਨਸ਼ਿਆ ਜਾਂਦਾ
ਜਦ ਮੈਂ ਸੁਣਦਾਂ
ਜੈਕਾਰੇ ਦੀ ਗੂੰਜ ਨੂੰ।

ਇਸਦੀ ਇਕੋ ਧਮਕ
ਕਿਲਬਿਖ ਨਸ਼ਟ ਕਰੇ
ਜੁਗਾਂ ਦੇ
ਜੋ ਦੇਹੀ ਨੂੰ ਖਾਂਦੇ ਨੇ
ਕਿਸੇ ਅਸਾਧ ਰੋਗ ਦੇ ਵਾਂਗ।

ਸਭ ਮਰਜਾਂ ਦੀ ਦਵਾ
ਸਤਿਗੁਰਾਂ ਨੇ ਬੰਦ ਕੀਤੀ
ਇਸ ਜੈਕਾਰੇ ਦੀ ਗੂੰਜ ਅੰਦਰ।

ਨਿਆਰੇ ਪੰਥ ਦਾ
ਨਿਰਾਲਾ ਤੋਹਫ਼ਾ ਇਹ
ਸਮੁਚੀ ਲੋਕਾਈ ਨੂੰ ਆਜਾਦੀ ਬਖਸ਼ਦਾ
ਨਿਘ ਬਣ ਬਹੁੜਦਾ
ਯਖ਼ ਹੋਈਆਂ ਜਮੀਰਾਂ ਲਈ
ਕਦੇ ਬੋਹੜ ਦੀ ਛਾਂ ਬਣਦਾ
ਵੇਗਾਂ ਦੀ ਧੁਪ ਦੇ ਲੂਹੇ ਰਾਹੀ ਲਈ।

ਜੈਕਾਰੇ ਦੀ ਗੂੰਜ ਅੰਦਰ
ਭੈ ਦੀ ਅਖ ਉਦਾਸ
ਆਇਆ ਸੂਰੇ ਚਿਤ ਉਲਾਸ
ਭਰਿਆ ਚਾਅ ਅੰਙਾਣਾ
ਸ਼ਹੀਦੀ ਦੀ ਸਿਕ ਦਾ।

ਸੁਣੀਂ ਦਾਤਿਆ ਮੇਰੀ ਅਰਦਾਸ
ਬਖਸ਼ੀਂ ਦਾਤ ਇਹ
ਸਿਕ ਪੂਰੀ ਹੋਵੇ
ਕਿ
ਸ਼ਹੀਦ ਹੋਵਾਂ
ਜੈਕਾਰੇ ਦੀ ਗੂੰਜਾਰ ਵਿਚ
ਜੈਕਾਰੇ ਦੀ ਛਾਂ ਵਿਚ
ਤੇਰੀ ਰਹਿਮਤ ਦੇ ਗਿਰਾਂ ਵਿਚ!

ਬੋਲੇ ਸੋ ਨਿਹਾਲ
ਸਤਿ ਸ੍ਰੀ ਅਕਾਲ
ਦੇਗ ਤੇਗ ਫ਼ਤਹ
ਹਰ ਮੈਦਾਨ ਫ਼ਤਹ
ਖ਼ਾਲਸੇ ਦੀ ਹਰ ਮੈਦਾਨ ਫ਼ਤਹ॥

Comments

  1. awesome.... the gurmukhi works! .... by the way, i managed to get -basic writings of existentialism by gordon marino- and im actually interested in this stuff!!

    thanks a lot!

    ReplyDelete
  2. Gurfateh Prabhsharanbir

    I am well with waheguru ji's Grace, and hope you to be sailing in the same boat.

    What's up veer! What's new! Read anything new? I recently read Devil on the Cross by Ngugi Wa Thiongo.

    Take Care

    Chardi Kala
    Parminder Singh

    ReplyDelete

Post a Comment

Popular posts from this blog

The Burden- ਮਨਿੰਦਰ ਸਿੰਘ ਕਾਂਗ ਰਚਿਤ ਪੰਜਾਬੀ ਕਹਾਣੀ ਭਾਰ- ਇਕ ਪੁਲਿਸ ਕੈਟ ਦੀ ਗਾਥਾ ਦਾ ਅੰਗਰੇਜੀ ਅਨੁਵਾਦ

ਆਧੁਨਿਕਤਾ, ਬਰਬਰਤਾ, ਅਤੇ ਪੰਜਾਬੀ ਕਵਿਤਾ

ਸਿੱਖ ਸੰਘਰਸ਼ ਤੇ ਪੰਜਾਬ ਦੇ ਖੱਬੇਪੱਖੀ ਚਿੰਤਨ ਦਾ ਸੰਕਟ